خماسيات الغضب

في ميت ألف شارع و ميت ألف حاره
و فوق سطح بيتا و كل العمــاره
و صوتهم مجلجل و مليان حــــراره
ولادنا قالولك هترحـــل فترحــــل
يا أبو المفهوميه دي لعبة شطـاره
.

.
التعلب فـــات التعلب فـــــات
دايخ بـيــلف سبـع لفـــــــات
ثوار أحرار شـُـبان و بنـــــات
لو بس صبرنا إتنين و تــــــــلات
راح تصحوا تلاقوا التعلب مـــات
.

.


الدبه وقعت في البيــــر
و شباب في ميدان التحرير
بيناضل بضميــر بضميــر
و بيهتف عاوزين تغييــر
واللهي هيطيــر هيطيــر
.

خماسيات الغضب رسالة إبن

أخبارك إيه يا اّمــه و أبويا عامل إيـــه ؟
قولي لأبوي يا اّمــه إبنك هتفخر بيـــــــه
ده إبنك بميت راجل و بوسيلي يا امه إيديـه
أنا عن قريـب راجع و  بفرحه تملي عنيــــه
أمنتك إدعيلي ... و الظالم إدعي عليـــــه
.

اّخـــر ما قالـــه الشهيـد مصطفـــي المصــري

حسبـــي  الله و نـِـعم الوكيــل

.
بـِـتكفنوني ليه ؟ ... دنا لسه ما مـُـتــــش
تخدوا عزايا ليه ؟ ... و أنا لسه مفرحتــــش
دنا لسه بنطق ... لا ... التانيه ملحقتــــش
و إن كان صحيح أنا مــُـت ... إيه يعني ميهمش
ده إن ألف واحد مات , ملاييـن هـَتتنفــــــس
.

دّب الجــدع رجليـــه

إهـداء إلي صاحب الصورة

دّب الجدع رجليه و الأرض من تحتيه فرحانه مبسوطـــــــه
وقلع ف توب م الخوف كان لابسه ألف ألوف زهقانه مكبوته
الهيبه ماليه عنيه واللهي لايقه عليه واللهي مظبوطــه
الظلم شافه وخاف واللي مشافشي أهو شاف والصوره محطوطه
رقص قلوب الناس والأرض بيه تنداس . ترقع في زغروطـــه
.

عسـكـــري أمــن مركـــزي !

يا أخويا ليه ماسك عصايا و جاي تسيح بيها دمــي ؟
دنا في حماك و إنته في حمايه و مصر إمك تبقي أمـــي
عـَموك و نسوك الحكايه ياريت نفوق بقي يا إبن عمي
يا بـِـلدي دنا فلاح صعيدي مانيش يهودي بلاش تـِهـني
إيدي في إيديك ننسي اللي فاتنا ده نفس همك هوه همي
.

النــــــــاس و أشبـاه النـاس

في ناس من كتر ما إتمنت تعيش بالستر مش باينـــه
وناس من كتر ما إستقوت نسـِت إن الحياه فانيــه
وناس تشقي في حياتهاكتير يقوم يسرقها ناس تانيه
وناس ممكن تدوس ع الغير مهي بتحسبها بالثانيـه
أنا دعيتك يا رب الناس بخير خرجني م الدنيــــا!!!!!!
.

الحـلـــــم المـشـنـــــــوق

بلف و أدور و أنا مربوط في ساقيه شـــــــــوق
كطير محبوس و حلمه في الفضـــي مخنــــــــــــوق
سراب الحلم توهني و كتفني بطوق ورا طـــــــــوق
بقيت بالوهم متغمي و خيلي في الضلام مطلـــــوق
كميت م الحياة بيهرب فـ نـط فـ حلم كان مشنـوق  !!!!!!
.